Apple son altı ildə 100-dən çox şirkət satın alıb

Amerikanın texnologiya nəhənglərindən olan Apple-ın CEO-su Tim Cook son altı ildə 100-dən çox şirkət satın aldıqlarını açıqlayıb. Bu, şirkətin hər üç-dörd həftədə bir şirkət alması mənasına gəlir.

Tim Cook hissədarlarla keçirdiyi iclasda bu satınalmaların böyük ölçüdə texnologiya və istedad transferi üçün olduğunu deyib.

Apple keçən ilin noyabr-dekabr dönəmində 111.4 milyard dollarla tarixinin ən yüksək gəlirini əldə etmişdi.

Ən yüksək məbləğli alış – Beats Electronics

Şirkətin son 10 ildəki ən böyük alışı qulaqlıq istehsal edən Beats Electronics olub. Apple rep musiqiçisi və prodüser Dr. Dre tərəfindən qurulan şirkətə 2014-cü ildə 3 milyard dollar ödəmişdi.

Şirkət 2018-ci ildə musiqi tanıma proqramı Shazam-ı 400 milyon dollara almışdı.

Apple kiçik şirkətləri satın alaraq, onların yeniliklərini öz məhsullarına inteqrasiya edir. Bunlardan biri 3D tanıma texnologiyasını inkişaf etdirən İsrail şirkəti PrimeSense-dir. Apple FaceID (üz tanıma) texnologiyasında bu proqram təminatından istifadə etmişdir.

Süni intellekt, virtual reallıq, podkast

Apple-ın keçən ilki yatırımları süni intellekt, virtual reallıq, ödəmə sistemi və podkast şirkətlərini də əhatə edir.

Şirkət 2019-cu ildə öz avtomatik sürüş texnologiyasına inteqrasiya etmək üçün sürücüsüz avtomobil istehsalçısı Drive.ai-ni satın aldı.

Apple 2016-cı ildə Uber-in Asiyadakı ən böyük rəqibi Didi Chuxing-ə bir milyard dollar yatırım edib.

Hal-hazırda Apple şirkətinin bazar dəyəri 2 trilyon dolların üzərindədir.

Elon Musk Apple-a Tesla-nı sata bilmədi

Analitiklər Apple-ın son altı ildə 100 şirkət satın almasına və böyük satınalma gücünün olmasına rəğmən, çox seçici davrandıqlarını deyirlər.

Elektrikli avtomabil istehsalçısı Tesla-nın CEO-su Elon Musk, 2013-cü ildə şirkətin çətin günlər keçirdiyi dövrlərdə Cook-a şirkəti satmağa çalışdığını, amma Tim Cook-un bunu rədd etdiyini açıqlamışdı.

Apple-ın həmçinin rəqiblərinin çoxu ilə müqayisədə satınalmalarda nisbətən daha qənaətcil davrandığı da məlumdur. Məsələn, Microsoft Linkedinə 26 milyard dollar, Amazon Whole Foods-a 17.3 milyard dollar, Facebook WhatsApp-a 19 milyard dollar ödəmişdi. Apple-ın ən böyük 10 alışının cəmi, bunların hər hansı biri üçün ödənən məbləğdən çox aşağıdır.

azAzerbaijani